Chronicles of a Civil Engineer in Saudi (Cebuano/Visayan)

This slideshow requires JavaScript.

Sa sobra tulo ka tuig nakong pamuyo ngari sa Tungang Sidlakan, naka tigumtigum kog saktohang mga storyang agi ra nga mahimuot pod kos akoang kaugalingon. Magkatawa kong nag-inusara.

Sugdan nato kaniadtong pagbyahe nako mismo padung ngari. Perstaym nako makasakay ug dakong eroplano, Boeing 747. Kini gung bag-ong salta gyud ta, ma ignorante gyud ta aning himutangan sa sud niining higantehong sakyanan. Manug lupad pa lang, di sab ko kahuwat mugamit aning gamayng TV sa akong atubangan. Di man musiga, maong sige kog panuplok sa remote sa kilid, naa koy matuslukan nga may mutingog, cge sab kog pangita asa tong gatingog. Padayon ra kog tuslok, tanang butones akoang gituslok, hantod nga naluya ko kay di gyud musiga ang TV. Dugay-dugay niay miabot nga istiwardis, gipangutana ko kung naa ba koy gikinahanglan, mihangad ra ko niya uban akoang dagwayng inosente. As in pirte gyud nakong pagka way kalibutana. Mitubag ra ko ug ha?. Diha diha dayon na-amgo niyang burong gyud ko. Gitudlo niya ang suga sa akoang uluhan nga gasiga, mao toy timailhan nga gakinahanglan kag hinabang gikan sa istiwardis. Mao diay to ang natuslukan nako nga mutingog. Naulaw ko nga nagkatawa. Hehe.

So nia na ta sa Saudi. Ang mga baye ngari magsul-ob ug kupo nga ginatawag ug “abaya”, ug tabon sa ilang ulo nga ginatawag ug “niqab”. Mata ray makita. Ang problema kay ug magkaon sila, magsingari sab ug pukas pukas sa tabil sa nawong. Ako muy gikapuyan kada hungit. Maninggit dayon na sila ung makakita ug kidlap sa kamera! Abi nilag gikodakan na na sila. Mura pug unsa’y makita nga putos man tibuok lawas. Pero magkodakanay pod na sila. Ang problema ug unsaon nila pag tag sa facebook kay mata ra man tanan makit-an! Ambot sa kanding nga gipungos ang bungot.

Ang mga datuon nga Saudi, kabaw na sila maligo, humot na sila. Dili sama sa atoang panahom nga baho silag ilok. Ug atoang susihon, tanang taw sa kalibutan mubaho man gyud ang ilok kung dili maligo ug dili mag dyodorant. Pero kining mga Pakistano ug Indiano murag wa gyud ni sila ma bendisyonan ug kugi sa pagkaligo. Maong kusgan kayo nig gahom ilang mga ilok. Ang Indiano nga ania sa opisina, pagsulod sa ilong nimo ani iyang baho, dili mudiretso sa imong baga, diri motuslok sa imong agtang. Makalipong gyud sya. Usa ka tiun aduna say Pakistano nga miari sa amuang tunghaan, saktong wa pa koy kaon ato, pagkasimhut nako sa iyang alisngaw, matay nga gikutkot akoang tiyan! Di ka kasabot kay samot kag kagutom pero wa kay gana mukaon. Ang mga taxi ngari bahog gas nga bahog haplas di ka kasabot. Pero dili hinuon tanan. Pero ma immune ra man ka! Haha!

Ang nakamaayo ngari sa Jeddah, di ka mabalaka maglakat sa gawas dala imong gadgets kay daghag pulis ug wa may manulis kaayo, pero di pod nuon sa tanang lugar. Pero di sama sa Pinas nga mutikang ra kas inyong ganghaan, danger zone na dayon bitaw.

Ang Red Sea ngari, limpyo kaayo, biskan ang ania duol sa dakbayan. Masulundon man gud sa balaod ang mga pumuluyo. Di na pod sama sa Pinas nga pirteng hugawa ang atoang dagat duol sa syudad. Usa ka tiun kay nag sunset dinner mi sa kilids dagat (oo adunay ingon anang ka dramahan diri kay wa may lingaw! Haha), nakakita kog mga baby green turtles! Wala ra. Ang point ra is dili abusado ang mga tawo diri. Ug sa Pinas pa guro to, gisud na tos garapon or gibaligya’s merkado.

Walay ilimnung makahulubog ngari. Dili pwede sa balaod sa Islam. Basta magtapok ang mga magbarkada nga Arabo, magkape ra na sila, magtsaa, magkanta kanta, magstorya storya sa daplins dagat, ug mag sugilanon ug mga storyang gitik gitik (jokes). Wala’y sinehan ug discohan ug ilimnan ngari, pero malipay ra man diay gihapon ang mga tawo bisa’g walay ingon ana! Tipid kay wala’y bisyo, makatigum kag pinakurat. Pero daghang sindikato nga kahibaw pod maghimo ug ilimnong makahulubog, labi na mga Pinoy. Pero di lalim mapreso ngari kay latiguhon man ka kada Birnes bag-o ka ideport, depende ug unsa kabug-at imong sala. Aksyon sad tag kabalaka!

Barato kaayo ang gasolina ngari! Mahal pa ang tubig lagi. Ug may sakyanan ka ngari unya mupauli ka sa Pinas, magbatyag gyud kas kamahal sa krudo sa Pinas! Ug puede pa lang ang gasolina na lang imnon ngari. Haha, barato sab kaayo ang kuryente ngari mahitungod kay sa diesel gikan.

Ang mga Arabo kung mag-away, di kahibaw manumbag, padak-anay ra na sila sa ilang tingug, ug kinsay dakog tingug maoy daog. Cgeg hana pero di dayunon. Away na gyud na kung makakita kag naglaparuhanay ug tsinelas. Hehe!

Diri sa opisina, magsakit akoang ulo basta magdungan na ni silag istorya. Mura ni silag merkado, maayo unta ug naay gibaligyang isda nga lab-as unya barato! Dugay kaayo magsinabtanay, magsinggitanay murag gaaway, pero wala na sila gaaway, ga hisgotanay ra. So naay duha ga storya noh, may mosud na pod dugang duha magstorya. Para maghibatianay sila, kinahanglan mas dako sila’g tingug atong duhang una pod nga ga storya. Tiud tiud naa puy mosud nga may kaistorya sa telepono, dakuon pod iyang tingug para mabatian sya sa iyang kaistorya sa pikas linya. Haskang gubuta gyud! Wa pod ni sila’y giila nga lugar, bisag didto sa tunghaan sa boss, mag ingon ana pod na sila. Maayo na lang naimbento ang headphones, dayon nakong paslak sa akoang dalunggan.

Daghan kaayog iring ngari, gakatag sa palibot. Pero panagsaon ra gyud kaayo ang iro, as in makurat ka ug makakita kag iro, isinggitan gyud nimo sa imong mga kauban nga nakakita kag iro.

Ug naa kas abroad, ayaw gyud singarig kombert kay wa gyuy mahitabo nimo. Di gyud ka mahuman ug grocery! Kay inig kuha nimo dayon nimong kombert, ibalik man nimo kay mahal! Basta pagkaon gani, sige ra nga sige. Usahay dili malikayan, mag ahaw ka makatilaw ug saging kardaba abi ron. Unya P250 man ang kilo, apil pang panit nga baga kaayo! Pero kay gusto man nimo tambalan imung paglaway, kay lami man na gud isuwa sa ginamos. Agwanta na lang ka usahay. Kada inggkib nimo ayaw gyud dayon tunla. Pagtablaw usa sa iyang sabor dayong piyong piyong sa imong mata, dayong sambit nimog hmmmmm.. para sulit ang presyo! Hehe.

Di puyde mag uban ang bayi ug laki ngari nga di kasado. So kung mag det det ka (date sa ininglis), kinahanglan naa moy kuyog nga mag asawa, mapurdoy kag ahat! Haha. Pero ang uban paisugay ra man, ang sa madakpan lang! Pero pastilan aksyon sad kag kabalaka.

Naluya kog tabi! Unya na sad sa Part 2! Hehe.

Advertisements